მიხეილ სააკაშვილის ადვოკატი, შალვა ხაჭაპურიძე სპეციალური პენიტენციური სამსახურის სამედიცინო დეპარტამენტის ხელმძღვანელს, მალხაზ ურთქმელიძეს პასუხობს, რომლის თქმითაც ემპათიის მიერ მათთვის მიცემული დოკუმენტების თანახმად, მიხეილ სააკაშვილის მოწამვლა არ დასტურდება.
ხაჭაპურიძე ამბობს, რომ ექსპერტიზა უნდა ჩატარდეს ფრჩხილებზე და თმებზე და, რომ "პოლიტიკური მცდელობა იქნება სისხლის ანალიზით ამის ჩატარება."
"ვუთხარით, რომ ჩვენ ჩაგატარებინებთ, პრობლემა არ არის, უბრალოდ ჩაატარე ფრჩხილებზე და თმებზე და ჩაგატარებინეთ. იმიტომ, რომ ასე ეს ექსპერტიზა არ ტარდება. პოლიტიკური მცდელობა იქნება სისხლის ანალიზით ამის ჩატარება. ეს შეუძლიათ დაგუგლონ, არ უნდათ სპეციალური ლიტერატურის წაკითხვა, დაგუგლონ და იპოვიან, რომ სისხლის ანალიზებით ეს ვერ დგინდება."- ამბობს ხაჭაპურიძე.
ამერიკაში ჩატარებულ ტოქსიკოლოგიურ ექსპერტიზაში, რომელსაც პროფესორი დეივიდ სმიტი აწერს ხელს, წერია, რომ მიხეილ სააკაშვილის ორგანიზმში აღმოჩენილია მძიმე მეტალებისა და სხვა აგენტების არსებობა, მათ შორისაა ვერცხლისწყალი და დარიშხანი. ამ ნივთიერებებს უკავშირებს სპეციალისტი სააკაშვილის პათოლოგიურ სიმპტომებს.
რაც შეეხება ომბუდსმენის კონსილიუმის დასკვნას, მიხეილ სააკაშვილის მდგომარეობა მე-4 ხარისხის კახექსიით არის შეფასებული და ის სხვა ქვეყნის მრავალპროფილურ კლინიკაშია გადასაყვანი.
14 დეკემბერს ევროპარლამენტის მიღებულ რეზოლუციაში, მათ შორის, საუბარია მიხეილ სააკაშვილის განთავისუფლების და სამკურნალოდ საზღვარგარეთ გადაყვანის საკითხზე. ევროპარლამენტი მოუწოდებს საქართველოს პრეზიდენტს, სალომე ზურაბიშვილს გამოიყენოს თავისი კონსტიტუციური პრეროგატივა მიხეილ სააკაშვილის საკითხის მოსაგვარებლად.
სააკაშვილის ოჯახის წევრები და ადვოკატები მის უცხოეთში სამკურნალოდ გადაყვანას ითხოვენ - 12 დეკემბერს სტრასბურგში გამართულ პრესკონფერენციაზე კი, ევროპარლამენტარებმა მირიამ ლექსმანმა და ანა ფოტიგამ კიდევ ერთხელ მოუწოდეს ქართულ ოცნებას, გათავისუფლდეს სააკაშვილი ჯანმრთელობის მდგომარეობის გამო.
უკრაინის პრეზიდენმა ვოლოდიმირ ზელენსკიმ საქართველოს ხელისუფლებას მიმართა და მიხეილ სააკაშვილის სამკურნალოდ გადაყვანისკენ მოუწოდა. გავრცელებულ ვიდეომიმართვაში ზელენსკი საქართველოს ყოფილი პრეზიდენტის ჯანმრთელობის მდგომარეობაზე საუბრობს და აცხადებს, რომ "ის, რაც ახლა სააკაშვილის მიმართ ხდება, სისასტიკეა".
დახურვა